पार्क रोड़ परेड २०१२ सम्पन्न

कनेक्टिकट नेपाली समाजले हालै कनेक्टिकटको वेस्ट हार्टफोर्डमा भब्य परेड सम्पन्न गरेको छ | हरेक वर्ष आयोजना गरिंदै आएको पार्क रोड परेडको आयोजना वेस्ट हार्टफोर्ड टाउन र पार्क रोड एसोसिएसनले संयुक्त रुपमा आयोजना गर्ने गरेको छ | ५० भन्दा बढी संघ संस्थाहरुले भागलिएको सो कार्यक्रममा आ-आफ्ना संस्कृति झल्काउने बिभिन्न झाँकीहरु प्रस्तुत गरिएको थियो | उक्त परेडमा नेपाली भेषभूषा लगाएका बालबालिका, महिला र पुरुषगरी १०० जना भन्दा बढी नेपालीहरुको सहभागिता थियो |

उक्त परेडमा नेपाली र अमेरिकी झन्डाका साथै नेपाली संस्कृति झल्कने मादल, बाँसुरी र झ्यालीको धूनले हजारौं दर्शकलाई मनोरंजन दिएको थियो भने प्रत्युत्तरमा उनीहरुले भब्य तालीले परेडमा सरिक नेपालीहरुको स्वागत गरेका थिए |

लक्ष्मी बजगाईंको संयोजकत्वमा भएको उक्त परेड कार्यक्रमलाई सफल बनाउन संथाका अध्यक्ष सन्तोष लम्सालका साथै सदस्यहरु रेखा गौतम, रोमी योन्जन, कृष्ण अवस्थी रहेको एक उप समितिले महत्वपूर्ण भूमिका खेलेको थियो | यसैगरी जय राई, जेनिथ राई र रोमी योन्जनले मादल, बाँसुरी र झ्याली बजाएर परेडलाई रोचक बनाउन सहयोग गर्नु भएको थियो | उक्त परेडमा विभिन्न संघ संथाहरुले आ-आफ्नो पहिचान झल्काउने खालका झाँकीहरु प्रस्तुत गरेका थिए | कनेक्टिकट नेपाली समाजले पार्करोड़ परेडमा भाग लिएको यो तेश्रो पटक हो |